Илон Маск балаларға арналған чат-бот әзірлеп жатқанын айтты

SpaceX компаниясының басшысы, америкалық миллиардер Илон Маск xAI стартапы жасанды интеллектке негізделген Grok чат-ботының балаларға арналған нұсқасын жасауды жоспарлап отырғанын айтты, - деп хабарлайды Tengrinews.kz тілшісі.

Жаңа сервис Baby Grok деп аталады.

"Біз xAI аясында Baby Grok жасап жатырмыз. Бұл балаларға арналған (қауіпсіз) контентті ұсынатын қосымша болады", - деп жазды Илон Маск X әлеуметтік желісіндегі парақшасында.

SpaceX Масктың xAI стартапына 2 миллиард доллар инвестиция салмақ.

Айта кетейік, Илон Маск биыл ақпанда Grok 3 нұсқасын "Жер бетіндегі ең ақылды жасанды интеллект" деп атаған болатын. Алайда шілдеде Grok чат-боты дауға қалды: танымал бот X желісінде қолданушылардың сұранысына жауап ретінде антисемиттік пікірлер айтып, Адольф Гитлерді мадақтап, өзін "меха-Гитлер" деп атаған. Қолданбаны әзірлеушілер бұл жазбаларды жедел өшіріп, мәтіндік жауаптарға шектеу қойды. xAI компаниясы мәселені шешіп жатқанын және сүзгіні күшейткенін мәлімдеді.

Бұл оқиға Масктың көптен күткен Grok 4 нұсқасын таныстыруына дайындық кезінде болған. Ол жаңа нұсқаның айтарлықтай жетілдірілетінін уәде еткен, бірақ нақты қандай өзгерістер болатынын әлі ашып айтқан жоқ.

Сілтемесіз жаңалық оқисыз ба? Онда Telegram желісінде парақшамызға тіркеліңіз!