Вазадағы ақша. ҰҚК көлік вице-министрі ұсталған сәттің видеосын жариялады

Ұлттық қауіпсіздік комитетінің Сыбайлас жемқорлыққа қарсы қызметі Көлік вице-министрі Сатжан Аблалиевтің ұсталған сәтінен жедел түсірілген кадрларды жариялады, - деп хабарлайды Tengrinews.kz тілшісі.

Видеода құқық қорғау органдарының қызметкерлері шенеунікті көшеде тоқтатып жатқаны көрінеді. Кейін тергеушілер оның үйіне тінту жүргізуге келеді. Тергеу әрекеттері барысында үйіндегі вазадан көп көлемде қолма-қол ақша тәркіленеді.

Бұған дейін ҰҚК-нің Сыбайлас жемқорлыққа қарсы қызметі Сатжан Аблалиевтің ұсталғанын растаған болатын. Комитеттің мәліметінше, вице-министр пара алу күдігіне ілініп, сот санкциясымен қамауға алынған.

Еске салайық, Сатжан Аблалиевтің ұсталғаны туралы ақпарат 2 тамызда тарады. Сол кезде оның пара алды деген күдікке ілінгені хабарланған.

Сатжан Аблалиев 1970 жылы Атырау облысында дүниеге келген. Алматы автомобиль-жол институтын және Қазақ көлік және коммуникациялар университетін бітірген.

2023 жылдың қазан айынан бері Көлік вице-министрі қызметін атқарып келеді. Бұған дейін Солтүстік Қазақстан облысы әкімінің орынбасары және Автомобиль жолдары комитетінде жұмыс істеген.

Сілтемесіз жаңалық оқисыз ба? Онда Telegram желісінде парақшамызға тіркеліңіз!