Қазақстанда айлық жалақының орташа мөлшері аталды

Әлем елдері арасында айлық жалақының орташа мөлшері бойынша рейтингіде Қазақстан 80-орынға ие болды. Қазақстандықтардың жалақы мөлшері - 414,29 доллар, - деп хабарлайды ranking.kz.

Ең жоғары жалақы Швейцарияда, Сингапурде және Аустралияда, ал ең төменгі жалақы Шри-Ланкада тіркелген.

ТМД елдері арасында Қазақстанға қарағанда Ресейде (884,14 АҚШ доллары), Украинада (512,66 АҚШ доллары) және Арменияда (420,68 АҚШ доллары) жалақы мөлшері көп.

Молдовада (387,9 АҚШ доллары), Әзербайжанда (323,44 АҚШ доллары) және Өзбекстанда (277,73 АҚШ доллары) бұл көрсеткіштер төмен.

Қазақстанда биылғы бірінші тоқсандағы орташа айлық жалақы 285,4 мың теңгеге жеткен. Бұл былтырмен салыстырғанда 23,7 пайызға артық. 2021 жылы орташа айлық жалақы 230,8 мың теңге болған еді.

Өңірлер арасында ең жоғары жалақы мұнай-газ өндіретін аймақтарда тіркелген. Атырау облысында 477,9 мың теңге, бұл 1 жыл бұрынғыға қарағанда 17,8 пайызға артық. 

Екінші орында - Маңғыстау облысы. Онда - 416,2 мың теңге. Көшбасшы өңірлер үштігін елорда аяқтайды, онда - 366,5 мың теңге.

Ең төменгі жалақы Солтүстік Қазақстан облысында тіркелген, онда - 203,4 мың теңге. Былтырмен салыстырғанда 22 пайызға артық. 

Сілтемесіз жаңалық оқисыз ба? Онда Telegram желісінде парақшамызға тіркеліңіз!