Әйгілі Ким Кардашьянды бір топ зейнеткер тонап кеткен - БАҚ

Әйгілі фотомодель, шоу-бизнес жұлдызы Ким Кардашьянға жасалған шабуылдың мән-жайы белгілі болды, - деп хабарлайды РИА Новости Францияның LCI телеарнасына сілтеме жасап.

Шабуылды ұйымдастырушы осыған дейін бірнеше қылмыс жасаған Омар Старый лақап есімді 60 жастағы Омар Аит Хедаш екені анықталды. Ол Парижге ақша табу үшін барған. Содан ол қаладағы кафе даяшыларының бірінен Парижге америкалық мультимиллионер әйелдің келгенін естіген.

Айта кетейік, бұл қылмыстық топта 61 жастағы Дидье Дюбрек, 63 жастағы Юнис Аббас пен 72 жастағы Пьер Буианер болған. Шабуыл жасағандардың ең жасы - 54 жастағы Франсуа Делапорт. Сондай-ақ, Омар Аит Хедаш бұл іске ұлын да тартқан екен. Бірақ ұлы тек жүргізуші болған.

Еске сала кетейік, 3 қазанға қараған түні Парижде қаруланған ер адамдар Ким Кардашьянға шабуыл жасаған болатын. Ер адамдар бетперде киген және қолдарында қару болған. Кардашьянның өкілінің айтуынша, шабуыл жасағандар полицейдің формасында болған.