Димаш Құдайберген ата-анасымен бірге ән салып, ата-әжесіне бас иді

Қазақстанға келуіне орай ұйымдастырылған концертте Димаш Құдайберген ата-анасы Қанат және Света Айтбаевтармен бірге ән салды, - деп хабарлайды Tengrinews.kz тілшісі. 

"Қазақстан" орталық концерт залында Қытайдан I'm Singer байқауының екінші орнын жеңіп келген қазақстандық әнші Димаш Құдайбергеннің құрметіне орай кеш өтті. Концертте Димаш Құдайберген конкурста шырқаған "Туған Ел", "Дайдидау" және "Махаббат бер маған" әндерін орындады. 

Кеш қонақтарына Димаш пен оның ата-анасы Қанат пен Света Айтбаевтардың триосы үлкен сый болды, олар "Асыл Анашым" әнін орындады. Оның барысында Димаш Құдайберген сахнаның шетіне келіп, алдыңғы қатарда отырған ата-әжесіне бас иді. 

Концертке шамамен 3,5 мың адам келді. Сонымен қатар, тыңдармандары концерт ғимаратының дәлізінде флешмоб ұйымдастырды.