"Шудың бойында" хитінің авторы мен Жан Ахмадиев бірігіп, "Зың-зың" вирусына бейнебаян түсірді

"Шудың бойында" атты хит әнімен танылған Ахан Отыншиев пен өзін "Заманауи жырау" деп атайтын Жан Ахмадиев вирусқа айналған "Зың-зың" әніне бейнебаян түсірді, - деп хабарлайды Tengrinews.kz тілшісі.

Youtube хостингінде 7 қазанда жарияланған видео екі күннің ішінде 50 мың рет қаралған. Бейнебаян "Зың қыздар" деп аталады.

Еске салайық, биылғы қыркүйектен бері "Зың-зың" әні нағыз вирусқа айналған. Әлеуметтік желілерде осы әнге көптеген пародия түсіріліп, кең таралып жатыр. "Зың-зың" немесе "Шымкенттің қыздары" әнінде Шымкенттегі қыздардың сұлулығы жайлы айтылады. Бірақ әннің нақты қашан жазылғаны белгісіз, алайда бұл ән бірнеше аптаның ішінде хитке айналды.