Үйлену тойын жария қылып өткізетініме келіншегім де таңғалып жүр - Төреғали Төреәлі

Белгілі әнші Төреғали Төреәлі таяуда үйленуі тойын өткізеді. Ол биыл 25 жасқа толып отыр, ал осыған орай өтетін "Айхай 25" жеке концертінен кейін екі күш күн өткенде елге жария қылып той өткізетінін айтты. Бұл туралы әнші "31 телеарнаның "Айта берсін" тілшілеріне берген эксклюзив сұхбатында мәлімдеді. 

Ол тойдың 17 қазанда өтетінін айтты. "Сөзімде тұрдым деуге болады. Өйткені мен үйлену тойын жасаған кезде мұқым қазаққа жария қылып, айтамын деп уәде берген едім. Сол уәдеде тұру керек, жігіттің екі сөйлегені өлгені. Оған бәрі таңғалып жүр. Келіншегімнің өзі сөйтіп таңғалып жүр қазір. Мен өзі сөзінде тұрмайтын, тұрақсыз адамға ұқсамайтын сияқтымын негізі. Біздікі ниет, мұның бәрі Алланың қалауымен болады. Бұйыртып жатса, бізге ғана емес, бүкіл қазақ еліне келін болады деп ойлаймын", - деді ол.

Оның айтуынша, тойға келетін қонақтарды өзі шақырмайды екен. Бұл іспен музыкалық продюсері Жан Мұқанов айналысады. Мұқановтың айтуынша, тойға сәуірден бастап дайындық жүріпті.

"Бұл туралы ешкімге айтпадық. Ал енді шақырту билеттері дайын, құпия ұстаудың мән жоқ. Бұл шақыру билеттері қазір Астанада таратылып жатыр, Instagram желісінде суреттерін көре аласыздар. (...) Той телеарнадан көрсетіледі, үш-ақ адам сөз сөйлейді деп келістік", - деп мән-жайын ашып айтты әншінің продюсері.