Haval

Haval - Great Wall Motor қытай автоконцерніне жататын жаһандық автокөлік бренді.
Бұл бренд кроссовер мен жол талғамайтын көлік шығаруға маманданған. Брендтің атауы оңай есте сақталады және "I Have All" - "менде бәрі бар", яғни менде көлік, отбасы, жұмыс та, демалыс та бар деген ұғымды білдіреді.  Алайда, бұл сөздің айтылуы пікірталас туғызады: Қытайда ол "Хафу" деп айтылса, Қазақстанда әдетте "Хавейл" деп екпін екінші буынға түсіп, айтылады.

Haval тарихы 2005 жылы алғашқы Hover кроссоверінің шығуынан бастау алады. 2010 жылы оны Haval атты үлгі алмастырып, 2013 жылы Haval GWM компаниясының жеке суббрендіне айналды.  

Бүгінде Haval көліктері жайлылыққа, заманауи технологияларға және сапалы материалдарға мән беруімен танымал. HAVAL дәстүрлі бензинді қозғалтқыштардан бастап, заманауи гибрид жүйелерге дейін түрлі күш беретін қондырғыларды ұсынады. 

Қауіпсіздікке ерекше назар аударылады: HAVAL үлгілері халықаралық стандарттар бойынша, соның ішінде C-NCAP және ANCAP бойынша апаттық сынақтардан сәтті өтіп, белсенді және пассивті қауіпсіздік деңгейінің жоғары екенін дәлелдейді. Мысалы, H6 кроссовері C-NCAP жүйесі бойынша бірнеше рет 5 жұлдыз алған, ал 2023 жылы Jolion моделі ANCAP жүйесі бойынша 5 жұлдызды иеленді.  

HAVAL халықаралық нарыққа кеңінен шығып жатыр: бұл бренд көліктері 60-тан астам елде, соның ішінде Қазақстан, Ресей, Австралия, Оңтүстік Африка және Таяу Шығыс елдерінде қолжетімді. Бұл бренд Қытайдағы SUV сатылымдары бойынша үздік үштікке кіреді және бірнеше шетелдік өңірде көш бастап тұр.