JAC

JAC (Jianghuai Automobile Company) – 1964 жылы Хэфэй провинциясындағы Аньхой қаласында негізі қаланған қытайлық автокөлік құрастырушы компания. Бренд атауы энергия, динамика мен инновацияларға ұмтылысты білдіреді. Қазақ тілінде JAC атауы “Джак” деп оқылады.

Бастапқыда JAC жүк және коммерциялық көліктер шығарумен айналысып, бұл саладағы жетекші өндірушілердің біріне айналды. Уақыт өте келе, компания өнімдерінің аясын кеңейтіп, жеңіл көліктер, кроссоверлер, электр көлік құралдары мен автобустар шығара бастады.

JAC бірнеше брендке жататын көліктер өндіреді. Негізгісі – JAC Motors, бұл бренд шеңберінде жеңіл көліктер, жол талғамайтын көліктер мен жүк машиналары шығарылады. Сонымен қатар, компания электр көліктер бағытын да белсенді дамытып жатыр. Мұндай модельдер қатарында жастар мен заманауи технологияларды пайдаланушыларға арналған iEV және Sihao (Sehol) суббренді бар.

Компания электромобильдерді дамытуға белсенді инвестиция салып, аккумулятормен жүретін электр көлік құралдарын өндіру үшін NIO секілді халықаралық брендтермен бірлесе жұмыс істеп жатыр. Сондай-ақ, JAC автономды басқару секілді интеллектуалды технологиялар жасаумен де айналысады.

Компанияның даму тарихындағы маңызды кезеңдердің бірі – Volkswagen концернімен стратегиялық әріптестік орнату болды. 2017 жылы екі тарап JAC Volkswagen Automotive Co., Ltd. бірлескен кәсіпорнын құрды. Оның мақсаты – электромобильдер бағытын дамыта түсу және жаңа буын жүргізушілеріне арналған қолжетімді модельдер шығару. 2020 жылы Volkswagen өзінің кәсіпорындағы үлесін  арттырып, Қытай аумағындағы негізгі орталықтардың біріне айналды.