Афроқазақ болашақ жары үшін қазақ тілін меңгерді

23 жастағы афроқазақ Даниэль Джеймс болашақ жары үшін қазақ тілін меңгеріп алды. Tengrinews.TV тілшісіне берген сұхбатында ол қазақтың беташарын, сонымен қатар домбыраны битбокспен айту стилін де үйреніп жүргенін айтып берді. Таяу уақытта ол өз өнерін тойларда көрсеткісі келеді.

Қазірдің өзінде өнерпазға бір тапсырыс түсіп үлгеріпті. Ол тамыз айында тұңғыш рет тойға шықпақшы. Даниэль домбыраны жетік меңгерген, қазақ тілінде де судай таза сөйлейді. Алматыда туып-өскен оның репертуарында қазақтың 11 ұлттық күйі бар. 

"Менің шешем орыс, әкем болса Нигериядан. Алайда мен қазақпын", - дейді Даниэль.