Әйелінен жасырып, тоқалымен некесін қиюға келетіндер бар - АХАТ қызметкері

Алматының АХАТ бөлімінде ең қысқа уақытқа тіркелген неке туралы айтып берді, - деп хабарлайды Tengrinews.kz тілшісі. Түрксіб ауданының АХАТ жетекшісі Жанна Дүйсенбаеваның сөзінше, отбасы бір күннен кейін ажырасып кеткен. 

"Үлкен той болды. Бірнеше жыл бұрын болған. Мыңға жуық қонақ болды. Алматылықтар, дәулетті отбасылар. Таңғысын ажырасуға арыз беріп келіпті, өзара бір сыйлықтарды бөлісе алмай қалған екен. Осындай жағдай болған", - дейді Дүйсенбаева. 

Сонымен қатар, ол үйленген ер адамдар жас қыздармен некесін қиюға келетіндігін де айтты. 

"Әйелдерінен жасырып, тоқалдарымен некесін қиюға келеді. Оның үстіне діни ұстанымдары бар адамдар. Әрине алдымен мәлімет базамыз арқылы тексереміз, сосын олардың өтінішін кері қайтарамыз. Әйелдері барын жасырып, өзге әйелдермен некесін қиюға тырысқандар да болды. Оларды тоқтатып отырдық, бұл үшін жауапкершілік барын ескертеміз. Осыдан кейін беттері қайтатын", - деп атап өтті Жанна Дүйсенбаева.

Отбасыны қалай сақтап қалуға болады? Маман кеңесі