Америкалық танымал тележүргізуші қазақтың тағамдарын сүйіп жейді

Америкалық танымал тележүргізуші, "Жабайы тағамдар" бағдарламасының авторы Эндрю Зиммерн Қазақстанға келіп, қазақтың ұлттық тағамдары жайлы пікірін бөлісті, - деп хабарлайды Arizona Daily Star. 

Айта кетейік, бағдарламаның сегізінші маусымының премьерасы дүйсенбі күні, 13 сәуірде шығарылады және ол Қазақстанға сапар жайлы болады. Бағдарламаның анонсында тележүргізуші Қазақстан жайлы айтып жатып, қойдың миын, жылқының етін жегенін, шұбат ішкенін хабарлады. Жүргізуші Қазақстанда жануардың ішегіне ет салынатынына қатты таңғалғанын да жасырмады. 

"Мен Қазақстанда фантастикалық тағамдар жеп көрдім. Олар жылқыны сойып, жануардың ішегіне етті салады (...) Біз тауда болдық, атқа міндік. Өз қолымда бүркітті ұстадым, бұл өте ұлкен құс, ол қоянды көріп қалып, ұстап алды. Бұл таңғалатын шеберлік. Біз өзеннің жағалауында қоян жедік, бастапқыда мен оның терісін сыпырдым, содан кейін ашық отқа күйдірдім. Дұрыс істедім бе, білмеймін, бірақ тырыстым", - деді америкалық жүргізуші. 

Сонымен қатар, ол қазақтың ұлттық тағамы - асылған ет туралы пікірін айтты. Шетелден келген қонақ бұл астың қалай дайындалатынын дәптеріне жазып алған сияқты. "Бұл тағам жылқының етінен және қамырдан жасалады. Қазақтар онда пияз қосады. Маған тағам ұнады, мен бұл тағамды ұнатып қалдым", - деді Эндрю Зиммерн. 

Зиммерннің Қазақстанда түскен суреті.