“1000 пайызға өтірік“: Қырғызстан президенті туған ағасы және алтынға қатысты жанжал туралы айтты

Қырғызстан президенті Садыр Жапаров Kaktus.media-ға берген сұхбатында ағасына тағылған айыптауларға жауап берді, сондай-ақ кенже ұлы Нұрдәулеттің криптомиллиардер Джастин Санмен бірге Ала-Арчаға сапары туралы пікір білдірді, - деп хабарлайды Tengrinews.kz.

Жапаров ағасы Сабыр Жапаровқа қатысты айыптауларға жауап берді, оның алтын құймаларды ұстап түскен суреттері әлеуметтік желілерде тараған болатын.

Фото kaktus.media сайтынан

"Бұл жай өтірік емес – 100 емес, 1000 пайызға өтірік. Оның жалғыз аңдаусыз жіберген қателігі - Түркияға барып, алтын өңдеу зауытын аралап, қолына алтын ұстап суретке түскені. Бұл мәселе бойынша бұған дейін де егжей-тегжейлі түсініктеме бергенмін, қайталап жатпаймын", - деді Жапаров.

Оның айтуынша, суреттерді Сабыр Жапаровтың айналасындағы адамдар өз телефондарына түсіріп, кейін "сатып жіберген".

Жапаров егер ағасы шынымен де алтынды заңсыз шығарумен айналысса, олай ашық суретке түспейтінін атап өтті. Сонымен қатар, 2021 жылдан бастап "Құмтөр" нысандарында жаппай онлайн-бейнебақылау жүйесі енгізілгенін, бұл ұрлық жасау мүмкіндігін жоққа шығаратынын еске салды.

Қырғызстан президенті сондай-ақ "Ала-Аршада" криптомиллиардер Джастин Санмен бірге жүрген кенже ұлы Нұрдәулетке қатысты жағдайға түсініктеме берді. Жапаровтың айтуынша, мемлекеттік қызметтегі жұмыс кестесінің тығыздығына байланысты ол балаларымен сирек көріседі, сондықтан кейде ұлы қасында еріп жүреді.

Садыр Жапаров және TRON блокчейн-платформасының негізін қалаушы Джастин Сан "Ала-Арша" саябағында. Фото: president.kg

"Ол ағылшын тілін жақсы білетіндіктен, аудармашы ретінде де қызмет етеді. Алайда ол мемлекетке қатысты ешқандай істерге араласпайды және мемлекеттік мекемелермен бизнес жүргізбейді", - деді Қырғызстан президенті.

Сондай-ақ ол билікке келген сәттен бастап отбасы үшін "бұрынғы президенттердің қателігін қайталамау" туралы қатаң ереже орнатқанын мәлімдеді. Оның айтуынша, балалары да, аға-інілері де мемлекеттік лауазымдарға жіберілмейді. Туыстары жеке бизнеспен және инвесторларды тартумен айналысады, бірақ мемлекеттік құрылымдарды жеке мақсаттарына пайдаланбайды.