Ер адам кездесуге келген қызды смартфон қолданғаны үшін соттатқысы келген

Американың Остин қаласының тұрғыны ұнататын қызымен бірге киноға барғанда сүйіктісі смартфонға жиі қарап отырғандықтан оны сотқа берген, - деп жазады Life.ru.

Басылымның мәліметінше, ер адам қызды киноға шақырған. Алайда қыздың смарфтонға деген тәуелділігіне байланысты романтикалық кеш ойдағыдай болмаған. Киноға кірген соң шамамен 15 минуттан кейін қыз телефоны арқылы біреумен хат жазысып отырған. 

Ер адамның айтуынша, қыз 15 минуттың ішінде ұялы телефонына 10-20 рет қараған. Ол одан ұялы телефонына қарай бермеуін сұраған, алайда қыз ер адамның айтқанын тыңдамай, залдан шығып кетіп, сол күйі оралмаған.

Осылайша, ер адам қыздан әдепсіз әрекеті үшін билеттің ақшасын ($17,31) өндіріп алуды шешкен. Ал қыз өз кезегінде сол сәтте міндетті түрде ұялы телефонына жауап беруі керек болғанын айтқан.