Ердоған сырқат туралы хабар тарағаннан кейін үгіт-насихат шараларын тоқтатты

Түркия президенті Режеп Тайып Ердоған сырқаттанғаны туралы хабардан кейін барлық қоғамдық шараны тоқтатты, - деп хабарлайды Tengrinews.kz тілшісі Deutsche Welle басылымына сілтеме жасап.

Басылым мәліметінше, Ердоған 26 және 27 сәуірдегі күнтізбесіне асқазан ауруымен ауырғаннан кейін өзгерістер енгізген. Түркия басшысы Twitter парақшасында үйде демалатынын хабарлады.

"Бүгін дәрігердің кеңесімен үйде демаламын. Өкінішке орай, бүгін Қырыққале, Йозгат және Сивастағы тұрғындармен кездесе алмаймыз. Ертеңнен бастап іс-шараларымызды жалғастырамыз", - деп жазды ол.

Ердоған бүгін жоспарланған барлық іс-шараларда вице-президент Фуат Октайдың оны алмастыратынын атап өтті. Ол өзіне денсаулық тілеген ел азаматтарына алғыс айтты.

"Маған дұға-тілектерін жеткізген асыл ұлтымның әрбір өкіліне, бауырларыма алғыс айтамын. Осы сәтті пайдалана отырып, барша азаматтарыма денсаулық, бейбітшілік пен амандық тілеймін", - делінген хабарламада.

Сілтемесіз жаңалық оқисыз ба? Онда Telegram желісінде парақшамызға тіркеліңіз!