Мас қазақстандық Ресейден Тайландқа бағыт алған ұшақта шатақ шығарды

Екатеринбургтен Пхукетке бағыт алған ұшақ ішінде жанжал шығарған қазақстандыққа қатысты Ресейде қылмыстық іс қозғалды. Бұл туралы РФ Тергеу комитетінің орталық тергеу басқармасының сайтында хабарланған. 

"2018 жылдың 19-20 ақпан аралығы Қазақстан Республикасының азаматы "Азур эйр" рейсінде жолаушы болып отырып, мас күйде былапыт сөздер айтып, өзге жолаушылармен және жолсеріктермен жанжал шығарған. Экипаж мүшелері мен жолаушылардың ескертулерін елемеген, осы арқылы кейінгілердің қауіпсіздік үшін алаңдаушылығын тудырған", - делінген хабарламада. 

Қазақстандық РФ ҚК-нің 13-бабының 1-тарауының "в" тармақшасы бойынша қылмыстық іс жасады деген күдікке ілінді. Қылмыстық іс қозғалды.