Омикронға қатысты алаңдаушылық бәсеңдегені әлемдік қор нарығына қалай әсер етті?

Омикрон штамына қатысты алаңдаушылық бәсеңдеп, инфляциялық қысым артуы аясында әлемдік қор нарығы өсіп жатыр, - деп хабарлайды Tengrinews.kz тілшісі Deutsche Welle агенттігіне сілтеме жасап.

Басылым мәліметінше, Америка Құрама Штаттарында S&P 500 0,6 пайызға өсіп, үшінші күн қатарынан жаңа рекорд көрсеткішпен жабылды. Барлық 11 негізгі салалық S&P 500 индекстері өнеркәсіптік және қаржылық компанияларда өсті. Денсаулық сақтау саласының индексі бұрын-соңды болмаған жоғары деңгейге жетті.

Германияның DAX индексі де үшінші күн қатарынан көтеріліп, 1,04 пайызға өсті. Францияның CAC 40 индексі - 0,8 пайызға, Лондондағы FTSE 100 0,4 пайызға өсті.

Нью-Йорк қор биржасында Dow Jones индексі 204,96 тармаққа (0,57 пайыз) 35 958,85-ке дейін, S&P 500 33,68 тармаққа (0,72 пайыз) 4 730,24-ке дейін, ал Nasdaq Composite 127,60 тармаққа (0,82 пайыз) 15 649,49-ға дейін өсті.

Reuters агенттігі мәліметінше, Ұлыбританиядағы алдын ала зерттеу өсімге ықпал еткен: омикрон штамын жұқтырғанда "дельтаға" қарағанда ауруханаға жатқызу ықтималдығы аз екені.

"Жаһандық акциялар омикрон жұқтырғанда "дельтаға" қарағанда ауруханаға жатқызу ықтималдығы аз болуына байланысты өсті", - деді Interactive Investor сарапшысы Виктория Шолар.

Сілтемесіз жаңалық оқисыз ба? Онда Telegram желісінде парақшамызға тіркеліңіз!