Тегеран АҚШ-пен келісім бойынша өз міндеттемелерін орындау шартын жариялады

Иран президенті Масуд Пезешкиан егер Вашингтон өз міндеттемелерін орындаса, Тегеран да АҚШ-пен жасалған келісім бойынша өз міндеттерін атқаратынын мәлімдеді. Бұл туралы саясаткер дүйсенбі күні кешке X әлеуметтік желісіндегі парақшасында жазды, деп хабарлайды Tengrinews.kz ирандық телеарнаға сілтеме жасап.

Пезешкианның айтуынша, Иран мен АҚШ арасындағы кез келген келісім қоқан-лоқы немесе біржақты қысымға емес, өзара құрмет пен ортақ міндеттемелерге негізделуі тиіс.

"Өзара түсіністік – бұл екіжақты қозғалыс жолы. Егер америкалық тарап келісімді ұстанса, біз де өз міндеттемелерімізді орындаймыз. Біздің ойланбай қару сілтеу мен негізсіз қоқан-лоқыларға берер жауабымыз – шешім қабылдауда парасаттылық пен адамдық қадір-қасиетке сүйену, ал әрекет ету уақыты келгенде батыл әрі қорықпай қорғану", - деп жазды Иран президенті.

Телеарна ақпаратынша, Иран әділдік пен теңдікке негізделген салмақты диалогқа әрдайым дайын екенін көрсетіп келеді және мәжбүрлеудің кез келген түрін немесе құрғақ уәделерді үзілді-кесілді жоққа шығарады.

Тегеран мәселені бейбіт жолмен реттеуге ұмтыла отырып, Ислам Республикасы өз егемендігі мен ұлттық абыройын қарумен қорғауға толықтай дайын екенін бірнеше рет баса айтты.

Осы ұстанымды растай отырып, Иран СІМ ресми өкілі Исмаил Багаи дүйсенбі күні АҚШ-пен техникалық келіссөздер 14 тармақтан тұратын екіжақты өзара түсіністік туралы меморандумның негізгі шарттары толық орындалғаннан кейін ғана басталатынын мәлімдеді.

Багаидың сөзінше, Иран алдағы күндері Қатарда АҚШ-пен қандай да бір келіссөздер жүргізуді жоспарлап отырған жоқ.

Дипломат мұндай келіссөздердің басталуы меморандумның нақты ережелерінің жүзеге асуына байланысты екенін ескертті. Оның ішінде ең алғашқы тармақ – Ливандағы әскери қимылдарды тоқтату, сондай-ақ активтерді бұғаттан босату, Ормуз бұғазындағы кеме қатынасына қатысты мәселелерді реттеу және АҚШ берген лицензиядан кейін Иранның мұнай өнімдерін сату мүмкіндігі бар.

18 маусымға қараған түні Иран мен АҚШ 28 ақпанда басталған әскери қақтығысты тоқтатуды көздейтін меморандумға қашықтан қол қойды. Меморандум АҚШ-тың теңіз блокадасын алу мерзімін және Иранның Ормуз бұғазында кеме қатынасын қалпына келтіру уақытын айқындайды.

Бұдан бөлек, Иран ядролық қару иемденбеуге міндеттенеді, ал ирандық ядролық бағдарлама мәселесі жеке келісіммен реттелуі тиіс. Тараптар 60 күн ішінде осы мәселе бойынша келіссөздер жүргізеді. Тегеран үшін бұл процестің нәтижесі Иранға қарсы санкциялардың алынуы болуы тиіс.