Техаста белгісіз біреу 20-дан аса шіркеуге келушіні атып тастады

Жексенбіде АҚШ-тың Техас штатының оңтүстік бөлігінде орналасқан Сан-Антонио қаласындағы баптистік шіркеуге келушілерге белгісіз біреу оқ атты, - деп хабарлайды Еuronews.

Америкалық телеарналар мәліметінше, осы оқиғаның салдарынан кемінде 20 адам қаза тапқан. Fox News телеарнасы бұл мәліметті полицияға сілтеме жасап хабарлады. Шабуылдаған адамның көзі жойылған. 

Оқиға орнына полиция мен жедел-жәрдем келіп жеткен. Нақты бір ресми мәлімет таратылған жоқ. Төтенше жағдай жергілікті уақыт бойынша 11:30-да (Астана уақыты бойынша 23:30) "Бірінші баптистер шіркеуінде" болған. 

АҚШ президенті Дональд Трамп Twitter желісінде Техастағы жағдайды бақылауға алғанын мәлімдеді. "ФТБ мен құқық қорғау органдары оқиға орнында жұмыс істеп жатыр. Мен Жапониядан осы жағдайды бақылап отырмын", - деді мемлекет басшысы.