Трамп пен Зеленскийдің кездесу кестесі жарияланды

Ақ үй АҚШ президенті Дональд Трамп пен Украина лидері Владимир Зеленскийдің екіжақты кездесу кестесін жариялады, - деп хабарлайды Tengrinews.kz тілшісі.

Кестеге сәйкес, БАҚ мәліметінше, 18 тамызда Астана уақытымен сағат 21:00-де еуропалық көшбасшылар Ақ үйге келеді. Астана уақытымен сағат 22:00-де Трамп Зеленскийді қарсы алады, содан кейін олар сағат 22:15-те кездесуді бастайды. Бұдан соң Астана уақытымен сағат 23:15-те Трамп ЕО көшбасшыларын қарсы алады, 23:30-да олар бірлескен фотосуретке түседі, ал 00:00-де олардың кездесуі басталады.

Бұл ретте Зеленский Вашингтонға келгенін хабарлады. Зеленский АҚШ-қа шақырғаны және қолдағаны үшін алғыс білдірді. Ол АҚШ және Еуропамен бірлескен күш-жігер Ресейге соғысты тоқтатуға мәжбүр етеді деген сенім білдірді.

Өз кезегінде Трамп Зеленский "егер қаласа, Ресеймен соғысты бірден аяқтай алады немесе жалғастыра алады" деп мәлімдеді.

"Бұл қалай басталғанын еске түсіріңіздер. Обама қайтарып берген Қырым (12 жыл бұрын, бірде-бір оқ атылмай!) қайтарылмайды және Украина НАТО-ға кірмейді. Кейбір нәрселер ешқашан өзгермейді", — деп жазды Трамп Truth Social әлеуметтік желісінде.

Айта кетейік, дүйсенбі, 18 тамызда, АҚШ президенті Ақ үйде Украина президенті Владимир Зеленскийді, содан кейін Еуропа елдерінің көшбасшыларын қабылдайды. Олар Трамптың Ресей президенті Путинмен Аляскада өткен кездесуінің қорытындыларын талқылауы тиіс.

Сілтемесіз жаңалық оқисыз ба? Онда Telegram желісінде парақшамызға тіркеліңіз!