"Вампир" түнгі клубта ММА спортшысын өлтірді

Великий Устюг қаласында (Вологод облысы) 19 жастағы ММА спортшысы Денис Раздрогов қаза тапты, - деп хабарлайды gorodche.ru.

Спортшы қала орталығында орналасқан түнгі клубтардың бірінде жергілікті үш тұрғынмен жанжалдасып, артынша қаза тапқан. Оқиға желісі мынадай болған: Клубқа кірмекші болған жігіттер мекеме әкімшісіне қоқан-лоқы көрсеткен, ал 19 жастағы сол әкімшінің жағына шығып, жергілікті тұрғындармен ерегескен. 

Осы жанжалдан соң, спортшының қарсыластары (бұрын сотталған 31 жастағы лақап аты "Вампир" Сергей Попов, Алексей Бучнев және Алексей Глазачев) бір жаққа кетіп қалып, сол жерге мылтықпен оралған. Попов 19 жастағы спортшының жамбасынан оқ атқан, көп қан жіберген Денис Раздрогов қайтыс болған. 

Түнгі клубқа кіретін жерде орналасқан бейнебақылау камералары шабуылдаған екі адамның мылтық ұстап келе жатқан сәтін түсіріп алған.