Венесуэла жарықсыз қалды. Мамандар диверсия жасалғанын хабарлады

Венесуэладағы 23 штаттың 21-інде, оның ішінде елдің астанасы Каракаста электр қуаты жаппай сөндіріле бастады, - деп хабарлайды Tengrinews.kz тілшісі РИА Новостиге сілтеме жасап.

Агенттіктің мәліметінше, Каракаста электрмен жабдықтау жүйесінің бұзылуына байланысты метрополитен жолы тоқтап, ұялы байланыста кідірістер пайда болған.

Электр энергиясы бойынша Венесуэла ұлттық корпорациясы елдегі "Эль-Гури" су электр станциясына диверсия жасалғанын хабарлады. Станциядағы жағдайдың мән-жайы туралы ақпарат жоқ.

2016 жылы қаңтарда "Эль-Гури" қуаты бойынша әлемдегі үздік төрт станция қатарына енген болатын.