+7 (777) 001 44 99
Қазақша
Русский
English
Астанада өтіп жатқан Азия чемпионатында қазақстандық грек-рим күресінің шеберлері тағы бір алтынға қол жеткізді. Бүгін Ерұлан Ысқақовтың бағы жанып, құрлық чемпионы атанды, - деп сүйінші сұрайды Tengrinews.kz.
98 келі салмақ дәрежесінде боз кілем көрігін қыздырған Ерұлан финалда жапон жігіті Акира Осаканы алып ұрды. Жауырын жерге тигізіп, Азия чемпионы атанды.
Ол алғашқы белдесуінде тәжік Хабиболло Абдуллаевты айқын басымдықпен жеңген болатын. Ширек финалда Қытай балуанын да бұйым құрлы көрмеді. Жартылай финалда Үндістан үмітін де сегіз бал айырмасымен ұтып, басымдық танытты.
Ал финалда жапон жігітін боз кілемге алып ұрғанын жоғарыда айттық. Осылай қарсыластарының бәрін қоғадай жапырып, өз салмағында теңдессіз танылды.
Бұл – Таңат Сағындықов жаттықтыратын грек-рим күресі шеберлерінің екінші алтыны. Кеше 85 келі салмақ дәрежесіндегі Нұрсұлтан Тұрсынов құрлық чемпионы атанған. Осылай екі алтын аламыз деген бас бапкер сөзінде тұрды.
