+7 (777) 001 44 99
Қазақша
Русский
English
Жапонияның Саппоро қаласында өтетін Қысқы Азиада-2017 ойындарында Қазақстан туы ресми түрде көтерілді, - деп хабарлайды Vesti.kz.
Ту көтеру рәсімі бүгін, 17 ақпанда өтті. Бұл туралы толығырақ ҚР Спорт және мәдениет министрлігі жанындағы спорт және дене шынықтыру істері комитетінің төрағасы Елсияр Қанағатов айтып берді.
"Бұл әдеттегі Азия елдерінің спортшылары қатысатын іс-шара. Туымыз көтерілді, әнұранымыз орындалды. Енді біз континенттік жарысқа ресми түрде қатысамыз. Командаларымыздың барлығы келді. Үлгермей қалғандары енді келе жатыр. Қатысушыларға барлық жағдай жасалған. Енді жарыстарға дайындықты бастаймыз", - деді Елсияр Қанағатов.
Сондай-ақ, спорт және дене шынықтыру істері комитетінің төрағасы бұл ойындарда кімдерден жеңіс күтетінін айтып өтті. "Могулшыларымыздан Юлия Галышева мен Дмитрий Калмыков, биатлоннан Галина Вишневскаядан жақсы нәтиже күтеміз. Сондай-ақ, шаңғы жарысынан қатысатын Николай Чеботько мен Сергей Черепанов бар. Олар жақсы өнер көрсете алатындарын дәлелдегісі келеді", - деді Қанағатов.
Еске сала кетейік, Қысқы Азиада-2017 ойындары Жапонияның Саппоро қаласында 19-26 ақпан аралығында өтеді. Спортшылар жарыстың 11 түрінен өнер көрсетіп, 64 медальға таласады. Қазақстан құрамасының спортшыларын мына жерден көре аласыздар.
