+7 (777) 001 44 99
Қазақша
Русский
English
Қазақша
Русский
English
Италияда өтіп жатқан волейболдан әлем біріншілігі барысында Қазақстанның ескі әнұраны шырқалды, – деп хабарлайды "Алаш айнасы" басылымы.
Бұл жайт Қазақстан мен Голландия командалары арасындағы кездесу барысында болған. Шара барысында Қазақстанның ескі әнұраны неліктен қойылып кеткені әзірге белгісіз.
Айта кетейік, Қазақстанның әнұранына қатысты мұндай жайттар бірінші рет тіркеліп отырған жоқ. Қыркүйек айының басында "Алматы" және "Бейбарыс" хоккей командалары арасындағы матчтың ашылуында Қазақстанның ескі әнұраны орындалды. 7 қыркүйек күні болған ойын барысындағы бұл олқылыққа Балуан Шолақ атындағы спорт сарайының әкімшілігі жол берген. Қазақстанның көне әнұраны бірнеше секунд ойналғанымен, оны ойынның жүздеген көрермені және матчты теледидардан тамашалаған мыңдаған адам естіді.
Одан бөлек, осыған ұқсас жайт Мәскеуде ЦСКА мен "Барыс" арасындағы матчында болған еді. Ойын 2013 жылдың қараша айында ЦСКА мұзды спорт сарайында өтті. Бұдан кейін Мәскеу командасының өкілдері астаналық клубтан және барлық қазақстандықтан кешірім сұрады.
Волейболдан әйелдер арасындағы әлем чемпионаты 23 қыркүйек пен 12 қазан аралығында өтеді. XVIІ рет өтіп жатқан байрақты бәсекені Италияның Рим, Милан, Триест, Модена, Бари және Верона қалалары қабылдайды. Жалпы биылғы әлем чемпионатына 140 елдің арасынан іріктеуден іркілмей өткен 23 команда және алаң қожайындары ретінде Италия құрамасы қатысады. Бас-аяғы - 24 команда. Бұл командалар жеребе бойынша алты-алтыдан төрт топқа бөлінген. Жеребенің қорытындысы бойынша Қазақстан құрамасы "С" тобына түсті. Қарсыластарымыз – АҚШ, Ресей, Таиланд, Нидерланды және Мексика волейболшылары. Алғашқы кездесуді біздің қыздар Голландия құрамасына қарсы өткізіп 0:3 (25;21, 25;17, 25;21) есебімен жеңіліп қалды. Енді Қазақстан құрамасы келесі кездесуін ертең АҚШ құрамасына қарсы өткізеді.
