+7 (777) 001 44 99
Қазақстандық журналист Әнуар Шәлекенов Шарм-эль-Шейх әуежайында жарнама тақтасы құлап, қаза тапқан әйел туралы айтты, - деп хабарлайды Tengrinews.kz тілшісі.
"Ақмарал Мұқанова - менің кіндік шешем, ол - менің анамның жақын құрбысы, олар бала кезінен дос болған", - деді журналист.
Оның айтуынша, марқұм Ақмарал Мұқанова ұзақ жыл бойы Ақтөбе облысының Ішкі істер органдарында жұмыс істеген. Ол зейнетке шығып, кейін бірнеше жыл Астанада ұлымен бірге тұрған.
Журналист оның кіндік анасы өте мейірімді әйел болғанын айтты.
"Ол әрқашан жарқырап жүретін, сапарға шыққанды жақсы көретін, ұлымен жиі саяхаттады", - деді журналист.
Оның сөзінше, қайғылы оқиға кезінде әйел ұлымен бірге болған, ұлы әлі де Мысырда.
"Жексенбіде осы жаңалықты естідік. Шынымды айтсам, өте ауыр", - деді Шәлекенов.
Еске салайық, бұған дейін Мысырдың Шарм-эль-Шейх әуежайында жолаушылардың үстіне жарнама тақтасы құлағаны хабарланды. Қайғылы оқиға салдарынан Қазақстан азаматы қаза тапты, тағы екі адам жеңіл жарақат алды.
Әуекомпания мәліметінше, барлығы төрт адам зардап шеккен.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
