+7 (777) 001 44 99
Қазақша
Русский
English
Қазақстандықтарға Beeline байланыс операторынан (ЖШС "КаР-Тел") үй интернеті тарифтерінің едәуір қымбаттайтыны туралы хабарлама келді. Осыған байланысты жағдайды түсіну үшін Tengrinews.kz тілшісі Бәсекелестікті қорғау және дамыту агенттігіне (БҚДА) жүгінді.
Ведомство бұл жағдайды зерттейтінін мәлімдеді.
"2025 жылғы ақпаннан бастап ЖШС "КаР-Тел" ұсынатын сымды интернет (үй интернеті) тарифтерінің өзгеруіне қатысты шағымдардың түсуіне байланысты оператордан заңнамаға сәйкес тиісті ақпарат талап етіліп, бұл мәліметтер бәсекелестікті қорғау саласындағы заңнаманың талаптарына сәйкестігі тұрғысынан зерттеледі", – деп жауап берді БҚДА Tengrinews.kz редакциясының сұрауына.
Егер нарық субъектілерінің әрекеттерінде бәсекелестікті қорғау саласындағы заңнаманы бұзу белгілері анықталса, агенттік тиісті антимонополиялық шаралар қабылдайтынын атап өтті.
"Кәсіпкерлік кодексінің 216-бабына сәйкес, антимонополиялық орган өз өкілеттігі шеңберінде бәсекелестікті қорғау саласындағы заңнаманы бұзуды тергеп, тергеу нәтижелері бойынша шешім қабылдайды. Тергеу дегеніміз – заңнаманы бұзуды растайтын немесе теріске шығаратын деректерді жинауға бағытталған іс-шаралар кешені", – делінген жауапта.
