+7 (777) 001 44 99
Қазақша
Русский
English
Қазақша
Русский
English
Қазақстандық кинотеатрларда кәмелетке толмағандардың киносеанстарға кіруін бақылау күшейтілді. Қазақстандықтар кинотеатрларға балаларды олардың ересек аға-әпкелерімен бірге кіргізбейтіндігіне шағымданды, - деп хабарлайды Massaget.kz тілшісі.
Алматы кинотеатрларының бірінде бұл Әкімшілік құқық бұзушылық туралы заңның 132-бабына сәйкес жүзеге асырылатынын айтты. Бұл тек сағат 22:00-ден кейін аяқталатын сеанстарға қатысты. Бұл заңға сәйкес, кәмелетке толмаған балалардың түнгі уақытта (22:00-ден 6:00-ге дейін) заңды өкілдерінің бірге жүруінсіз сеансқа кіруіне қатаң тыйым салынады.
"Сәйкесінше, кинотеатрдың ішкі нұсқауларына сәйкес, кинотеатр қызметкерлері балаларды ертіп әкелген адамдардан олардың туыстық байланыстарын растайтын немесе қамқоршылық құқықтары туралы құжаттарды, сенімхатты немесе сот шешімін талап етеді. Егер ересек адам еріп келген баланың тікелей туысы болмаса, сенімхат көрсетуі керек. Егер бала ата-анасымен бірге жүрсе, онда оның туыстық қатынасын растау үшін туу туралы куәлікті көрсету жеткілікті", - деп түсіндірді "Чаплин" кинотеатрлар желісінің коммерциялық директоры Дмитрий Кириенко.
Кәмелетке толмаған баланың заңды өкілдеріне ата-анасы, асырап алушылар, қорғаншы, қамқоршы, патронат тәрбиеші, асырап алушы ата-ана жатады.
Ал баланың ата-әжесі, нағашылары, тәтелері және өзге де туыстарына жоғарыдағы құқықтар ресми түрде берілмесе, олар кәмелетке толмаған баланың заңды өкілдері болып саналмайды.
Кинотеатр әкімшілігі егер киносеанс әлі басталмаса, сатып алушылар билетті қайтара алатынын атап өтті.
"Кинотеатр 22:00-ден кеш аяқталатын іс-шаралар мен фильм сеанстарына, сондай-ақ жас шектеулері бар іс-шаралар мен фильмдерге "балалар" тарифтері бойынша билеттерді сатпайды. Киносеансқа "ересек" тарифі бойынша кәмелетке толмаған адамға билеттер сатып алған жағдайда кинотеатр мұндай адамды фильм көруге жібермеуге құқылы. Мұндай жағдайда кинотеатр сатып алушының сатып алған билеттерінің күшін жояды", - делінген кинотеатрға бару ережелерінде.
Сондай-ақ кәмелетке толмаған баланы кинотеатрда заңды өкілдің қарауынсыз қалдыруға жол берілмейді.
