+7 (777) 001 44 99
Қазақша
Русский
English
Қазақша
Русский
English
Қылмыскерлердің "дропперлерді" қылмыстық мақсатта пайдаланатын алаяқтық деректері жиіледі. Бұл туралы Ұлытау облысының прокуратурасы хабарлады, - деп хабарлайды Tengrinews.kz.
Дропперлер деген кімдер?
Дропперлерді қылмыскерлер заңсыз қаржылық операцияларды жасыру үшін пайдаланады - олар өз шоттарына аударымдарды қабылдайды және қылмыскерлерге ақша жібереді. Мұндай әрекеттер алаяқтардың жеке басын және ізін жасыруға мүмкіндік береді.
Негізгі схемаларға "дропперлер" заңсыз жолмен алынған ақшаны алаяқтарға өз шоттары арқылы аударады немесе банк карталарын береді, осылайша нағыз қылмыскерлердің іздері жасырылады.
Сот арқылы ақшаны қайтару
Прокуратураның үйлестіруі бойынша, полиция органдары жәбірленушілерге Азаматтық кодекстің 953-бабына сәйкес "дропперлерден" негізсіз баюға байланысты алынған ақша қаражатын өндіріп алу механизмін түсіндіріп жатыр.
"Мысалы, алаяқтар алдау арқылы жәбірленушінің 26 миллион теңге сомасындағы ақшалай қаражатын иемденген. Оның 15,4 миллион теңге сомасындағы бір бөлігі "дроппердің" шотына аударылғаны анықталды.
Жәбірленуші Азаматтық кодекстің 953-бабы тәртібінде негізсіз байлықты "дропперден" өндіріп алу туралы талап арызбен сотқа жүгінді", - делінген хабарламада.
Сот қарауының нәтижесі бойынша, жәбірленушінің талап-арызы қанағаттандырылды.
Сот шешімдерінің статистикасы
Былтыр облыста сот 69 миллион теңге сомасына 42 талап-арызды қанағаттандырды. Биыл сот 28,3 миллион теңге сомасына 13 талап-арызды қанағаттандырған.
"Дропперлердің" алаяқтыққа қатысы бар екені анықталса, олар сыбайлас ретінде қылмыстық жауаптылыққа тартылады.
"Ұлытау облысының прокуратурасы азаматтарға оңай табыс табу туралы ұсыныстардан сақ болуды, жеке деректерді бермеуді және мұндай схемаларға қатысудан бас тартуды ұсынады", - делінген хабарламада.
