Астанада Токио мен Сеул сияқты мегаполистер үлгісімен екі деңгейлі жолдар жобасын іске асыру жоспарланып отыр. Алайда құрылыстың басталуына әлі уақыт бар - қазір жобалау алдындағы дайындық жұмыстары жүріп жатыр. Толығырақ мәліметті қалалық Көлік және жол-көлік инфрақұрылымын дамыту басқармасы хабарлады, - деп жазады Tengri Auto.
Жоба идеясы: әкімдік не дейді?
Былтыр желтоқсанда елорда әкімі Жеңіс Қасымбектің мәлімдеуінше, Астанада әлемдегі ірі мегаполистердің үлгісімен екі деңгейлі жолдардың құрылысын бастау жоспарда бар екені айтылды. Оның сөзінше, қаладағы көлік кептелісін азайтудың басты шешімдерінің бірі - көп деңгейлі транзиттік магистральдар салу болмақ.
Қала басшысының айтуынша, мұндай жолдар "Сеул, Мәскеу, Токио, Бейжің, Бангкок және Париж сияқты мегаполистерде сәтті іске асырылған". Қала билігінің есептеуінше, екі деңгейлі жолдарды енгізу елордадағы көлік кептелісін 30–40 пайызға азайтуға мүмкіндік береді.
Деректер жиналыып жатыр
Астананың Көлік және жол-көлік инфрақұрылымын дамыту басқармасы қазіргі уақытта жобалауды бастау үшін қажетті бастапқы деректерді жинау жұмыстары жүріп жатқанын нақтылады.
"Қазіргі уақытта техникалық шарттарды нақтылауды, қолданыстағы инфрақұрылымды талдауды, сондай-ақ бастапқы рұқсат беру құжаттамасын жинау мен өңдеуді қамтитын кешенді дайындық жұмыстары жүргізіліп жатыр", - делінген ведомствоның редакциямыздың ресми сауалына берген жауабында.
Бұл кезең аяқталғаннан кейін мамандар жобалау-сметалық құжаттаманы әзірлеуге көшеді.
Жоба қандай болатыны әлі белгісіз?
Болашақ жолдардың сипаттамасы - эстакадалар немесе тоннельдер болатыны - әлі анықталған жоқ. Бұл шешімдер тек инженерлік ізденістерден кейін қабылданады.
"Жобалау жұмыстары аясында эстакадалар, тоннельдер және өзге де көлік нысандарын қоса алғанда, тиісті көп деңгейлі шешімдерді салу қажеттілігі туындайтын учаскелер анықталады", - деп атап өтті басқармадағылар.
Нақты параметрлер көлік жүктемесіне, қала құрылысы жағдайларына және қауіпсіздік талаптарына байланысты болады. Жобаның алдын ала құны да әзірге белгісіз.
"Құнын бағалау жобалау-сметалық құжаттама әзірленгеннен кейін келесі кезеңдерде жүзеге асырылады", - деп түсіндірді ведомство өкілдері.
Жаңа жолдар және таяу жылдарға арналған жоспарлар
Алдағы 1–2 жылда елордада үш жаңа жол салу жоспарланған:
- Конгресс-орталыққа баратын жол;
- ММХҚИ (МГИМО) филиалына баратын жол;
- Асан Қайғы көшесі.
Бұл ретте қолданыстағы магистральдарды қайта құру немесе кеңейту жұмыстары қазіргі жоспарда қарастырылмаған.
Кептеліс мәселесі қалай шешілмек?
Жергілікті билік тек құрылысқа ғана емес, ұйымдастырушылық шараларға да басымдық беріп отыр. Елордада зияткерлік көлік жүйесін енгізу жұмыстары жалғасып жатыр.
2026 жылы жоспарланып отырған шаралар:
- 79 бағдаршам нысанында бейімделгіш реттеуді енгізу;
- тағы 18 нысанды жаңғырту.
"Көлік жүктемесін азайтуға бағытталған ұйымдастырушылық, технологиялық және көліктік шаралар кешені іске асырылып жатыр", - деп хабарлады басқарма.
Олардың қатарында қоғамдық көлікті дамыту, бағдаршамдар жұмысын оңтайландыру, мемлекеттік органдардың жұмыс кестесін өзгерту, сондай-ақ жол инфрақұрылымына нүктелік өзгерістер енгізу бар.
Осылайша, Астанадағы жолдарды жеңілдетуге арналған ең өршіл жобалардың бірі әзірге нақты мерзімдерсіз, құны белгісіз және іске асырудың соңғы нұсқасы айқындалмаған күйі дайындық сатысында тұр.
