+7 (777) 001 44 99
Қазақша
Русский
English
"AstanaMusical" театрының әртістері елорда тұрғындары мен қонақтарына жаңа керемет шоу - "Ер Төстік" аттас қазақ халық ертегісі желісі бойынша жасалған мюзиклін тарту етеді, - деп хабарлайды Tengrinews.kz тілшісі ҚР Мәдениет және спорт министрлігінің Facebook желісіндегі парақшасына сілтеме жасап.
Ведомство мәліметінше, мюзикл тұсаукесері 14 сәуірде "Қазақстан" орталық концерт залында өтеді.
"Ер Төстік" мюзиклі Ер Төстік батыр туралы көпшілік білетін сюжет қана емес, ізгілік пен зұлымдықтың, жамандық пен жақсылықтың қақтығысы туралы халықтық эпос.Туындының басты мақсаты - Жақсылық, Абырой, Ақыл, Намыс, Махаббат секілді жоғары адамгершілік сапаларды бекіту. Олардың толассыз күші Зұлымдықты жеңіп, қараңғылықты сейілтеді. Сондай-ақ, қызыққа толы оқиғалар, батырлық, ерлік және махаббат желісінің таңғажайып шешімі. Тамаша әуеннің жарқылына толы, бірегей хореография, жанды вокал, керемет бейне инсталляция, бір сәтте ауысып отыратын көзтартарлық декорациялар, әдемі костюмдердің ауысуы мен әртістердің кәсібилігіне толған әсерлі іс-әрекет көрерменді ертегілер әлеміне еліктіріп әкетеді", - дейді министрлік.
Сондай-ақ, министрліктің мәліметінше, спектакль сахнасы заманауи декорациялармен безендірілген, видеоинсталяциялар қосылған, орындаушылар үлкен әртістік шеберлікпен өз образдарын сомдайды. "Осының барлығы музыка авторы - Болатбек Нұрқасымов, либретто авторы - Әннәс Бағдат, сценарист және қоюшы-режиссері - Есләм Нұртазин сияқты үздік мамандардан құрылған шығармашылық топтың біріккен еңбегінің нәтижесінде дүниеге келді", - делінген ведомствоның Facebook желісіндегі парақшасында.
