Екінші орта салмақта WBO тұжырымы бойынша әлем чемпионы британиялық Билли Джо Сондерс (28-0, 13 КО) Boxing Social порталына берген сұхбатында IBF титулы сарапқа салынатын қазақстандық Геннадий Головкин (39-1-1, 35 КО) мен украиналық Сергей Деревянченко (13-1, 10 КО) жекпе-жегі жайлы ойын айтты, - деп хабарлайды Vesti.kz.
"Бұл сөзсіз Головкиннің кездесуі. Бірақ бұл өте ауыр 12 раунд болады, ол Головкиннің денсаулығының, өмірлік батареясының бір бөлігін алып қояды", - деді Сондерс.
Естеріңізге салсақ, 5 тамызда Халықаралық бокс федерациясы (IBF) Головкин - Деревянченко жекпе-жегін тағайындаған болатын. Екі тараптың келіссөз жүргізуіне 30 күн берілген. Сол уақыт ішінде келісе алмаса, промоутерлік сауда-саттық өтеді.
Бұған дейін Головкин орта салмақта IBF тұжырымы бойынша әлем чемпионы атағы үшін украиналық Сергей Деревянченкомен жекпе-жектің барлық талабына келіскені хабарланған.
Кездесу 5 қазанда Нью-Йоркте Madison Square Garden аренасында өтуі мүмкін.
