+7 (777) 001 44 99
Қазақша
Русский
English
Танымал боксшылар кіші Рой Джонс пен Василий Ломаченко, сондай-ақ файтер Қуат Хамитов Геннадий Головкин мен Сауль Альварес арасындағы үшінші жекпе-жек туралы пікірін айтты, - деп хабарлайды Tengrinews.kz тілшісі Vesti.kz сайына сілтеме жасап.
Кіші Рой Джонс Головкиннің керемет карьерасы болғанын айтып, оған сәттілік тіледі.
"Головкин қолынан келгеннің бәрін көрсетті. Десе де, жасы да әсер етеді. Ол қарсыласын жеңуге тырысты, бірақ қолынан келмеді. Менің ойымша, бастапқыда ол Андре Уордпен кездессе жақсы болар еді, бірақ ол Канелоны таңдады. Сол үшін оны құрметтеу керек. Оның кәсіпқой бокстағы карьерасы керемет болды, мен оған өмірінің келесі кезеңінде барлық жақсылықты тілеймін", - деді кіші Рой Джонс "Матч ТВ" арнасына.
Украиналық боксшы Василий Ломаченко да Геннадийдің жасын атап өтті.
"Бұл өте қызық болды. Тарихи сәт болды. Трилогия болды. Канело мықты болды, бірақ Геннадий тым қартайған шығар. Менің ойымша, Канело Биволмен реванш өткізуі мүмкін. GGG-ге келсек, білмеймін. Бұл оның шешімі. Ол қазір аңызға айналды. Карьерасын аяқтауы мүмкін", - деді Ломаченко FightSpace YouTube-арнасына берген сұхбатында.
Қуат Хамитов те жерлесін мақтады.
"Геннадий Головкин - шын өмірде Рокки Балбоа! 40 жасында ең үздік боксшыға 12 раунд қарсы тұру - ерлік! Бүгінгі жекпе-жекті көргеннен кейін сыным дұрыс екенін түсіндім, өйткені Головкин бес жыл бұрын салмақ қосып, барлық белбеуді Альвареске дейін жинап ала алар еді, бірақ, өкінішке қарай, бұлай болмады. Қалай болғанда да, ол тарихта қалды. Чемпионға құрмет, ол қазақстандық кәсіпқой бокстың пионері және атасы болып қала береді", - деп жазды Найман Instagram-парақшасында.
Трилогия 18 қыркүйекте Лас-Вегаста өтіп, Альварес төрешілердің бірауыздан шешімімен жеңген болатын.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
