Қазақстандық былғары қолғап шебері Жанат Жақиянов өзінің кезекті жекпе-жегінде Еуропа чемпионы (EBU) атағын қорғап, жеңіл салмақтағы Еуразия чемпионы (WBC Eurasia Pacific Boxing Council) деген атақты жеңіп алды, - деп хабарлайды Vesti.kz.
Еуропа чемпионы деген атаққа Жақиянов сәуір айында француз боксшысы Гуерфиді жеңгеннен кейін қол жеткізген болатын. Ол жекпе-жек Ұлыбританияда өтіп, оның 5-раундында отандасымыз қарсыласын нокаутқа жіберген.
Ал Еуразия чемпионы деген атақ үшін айқасты Жанат Минскіде грузиялық былғары қолғап шебері Гага Эдишервилиге қарсы өткізді. Бұл жекпе-жек көпшілік болжағандай ұзаққа созылған жоқ. Жекпе-жектің бірінші раундында-ақ Жанат қарсыласын нокаутқа жіберіп, өзінің Еуропа чемпионы деген атағын қорғады, сонымен бірге Еуразия чемпионы деген атақты қоса иеленді.
Бұл - 30 жастағы өреніміздің 23-жеңісі. Жалпы Жанат жеңіл салмақта кәсіпқой бокс шаршы алаңына 24 мәрте көтерілген. Оның 16-сын ол уақытынан бұрын аяқтаған.
Порталдың хабарлауынша, Жанат Жақияновтың келесі қарсыласы анықталып қойған. Ол - 26 жастағы автралиялық боксшы Фред Мундраби. Бұл екі боксшы арасындағы жекпе-жек 12 қараша күні Мельбурндегі Hisense Arena спорт кешенінде өтеді.
