+7 (777) 001 44 99
Қазақша
Русский
English
Қазақстан Республикасы Мәдениет және спорт министрлігінің тапсырысы бойынша "Адигул продакшн" кинокомпаниясының қатысуымен Ш.Айманов атындағы "Қазақфильм" АҚ түсірген "Біздің қаланың ханзадасы" көркем фильмі 19 қазаннан бастап прокатқа шықты, - деп хабарлайды Тengrinews.kz тілшісі киностудия баспасөз қызметіне сілтеме жасап. Режиссері әрі сценарий авторы - Қазақстанның халық артисі - Талғат Теменов.
"Адамдар арасындағы бөлтірік", "Қызғыш құс", "Махаббат бекеті" сынды фильмдерімен көрерменге жақсы таныс Талгат Теменовтың жаңа кинотуындысы жалғыздықтың күйін кешіп жүрген балалар үйінің 6 жасар тәрбиеленушісі мен қарттар үйінің ардагері арасындағы достығы туралы баяндайды.
"Біздің қаланың ханзадасы" - бұл Бибол есімді ерекше бала мен музыкант Қасымхан есімді қария туралы әсерлі оқиға. Фильмнің негізгі желісі - бала мен қарттың кездейсоқ кездесуі болып табылады. Бұл фильмдегі драматизм бір-біріне мүлде бөтен бас кейіпкерлердің соңында етене жақын болып кетулері. Фильм - адамның адамгершілік қасиеттерінің арқасында ғана шын бақытқа жетуге болатынын көрсетеді.
Фильмнің түсіру жұмыстары Астанада және Ақмола облысының Бурабай ауылында өтті. Басты рөлдерді Ануар Толеугажы және ҚР еңбек сіңірген қайраткері Төлеубек Аралбай ("Жаужүрек Мың Бала", "Жоюшы", "Тығырықтан жол тапқан") сомдады. Сонымен қатар, фильмге Қ.Қуанышбаев атындағы Қазақ музыка және драма театрының (Астана қаласы) актерлері түскен.
Еске салайық, "Біздің қаланың ханзадасы" фильмінің тұсаукесері (жұмыс атауы "Бибол") биыл 1 маусымда, Халықаралық балаларды қорғау күніне орай Астана қаласында өткен болатын. Сонымен қатар, аталмыш кинотуынды қыркүйек айында Ресейде өткен ІІ Халықаралық "Еуразиялық көпір" кинофестивалінің негізгі бағдарламасы шеңберінде көрсетілді.
Қазақстандықтар "Біздің қаланың ханзадасы" фильмін бүгін - 19 қазаннан бастап еліміздің кинотеатрларынан көре алады.
