+7 (777) 001 44 99
Қазақша
Русский
English
Алматы мектептерінің бірінде атыс жасаған ер адам бес жылға бас бостандығынан айырылды. Бұл туралы Tengrinews.kz тілшісіне Алматы қалалық сотының баспасөз хатшысы Қуандық Ешімет айтты.
Әуеліде оған 8 жылға дейін бас бостандығынан айыру жазасы берілуі мүмкін екені хабарланған еді. Еске салайық, бұл оқиға 23 желтоқсан күні болды.
Іс Қылмыстық кодекстің "Бұзақылық" бабынан "Бұзақылық ниеттен денсаулыққа қасақана ауыр нұқсан келтіру" бабына ауыстырылған еді. Алматы мектептерінің бірінде, директордың кабинетінде болған оқиғаға Құрбанжан Бабазов есімді азаматтың өз әйелімен жанжалдасуы себеп. Бабазов жанжал кезінде қалтасынан тапанша шығарып, бірнеше рет оқ атады, оның салдарынан әйелінің інісі жараланды.
"Екі рет оқ атылды, мен оның қайда тигенін білмей қалдым. Қорқып кеттім де, бұрышқа тығылдым, ол маған қару кезенді, үрейленіп отыра кеттім. Ол тағы бірнеше рет оқ атты. Үшінші ме, төртінші ме оқтан кейін айқайлай бастадым. Дәлізде менің бауырым тұрды, ол кіріп келгенде, бұл оны көздеп тағы атты, оқ бауырымның басына тиді", - дейді Бабазовтың бұрынғы әйелі Майнұр Тағырова.
