Алматы облысында сотталғандар арасында қақтығыс болып, салдарынан үш адам ауруханаға жеткізілді. Бұл туралы ҚР ІІМ ҚАЖ комитетінің баспасөз қызметі айтты, - деп хабарлайды Tengrinews.kz тілшісі.
ҚАЖ мәліметінше, бұл оқиға 5 қазанда ЛА-155/14 қауіпсіздігі орташа мекемеде болған.
"Мекеме қызметкерлері мен Ұлттық ұланның әскери қызметшілері сотталғандардың құқыққа қарсы іс-әрекеттерінің одан әрі күшеюіне жол бермей, жаппай тәртіпсіздікті тоқтатты.
Сотталғандарға алғашқы медициналық көмек көрсетілді, олардың үшеуі Қапшағай қалалық ауруханасында дәрігерлердің бақылауымен стационарда жатыр, олардың жағдайы қанағаттанарлық. Қазір мекемедегі жағдай тұрақты,", - делінген хабарламада.
Осы дерек бойынша сотқа дейінгі тергеу мен қызметтік тексеріс жүріп жатқаны айтылады.
Қазақстан жаңалықтары. Соңғы жаңалықтар. Telegram желісінде бізге жазыл!
