Алматыда пәтер ұрылары ұсталды

©️ polisia.kz

Алматыда пәтер ұрылары тобы ұсталды, - деп хабарлайды Tengrinews.kz тілшісі Polisia.kz сайтына сілтеме жасап.

Алматы Криминалдық полициясының қызметкерлері Ақтөбе облысындағы әріптестерінің көмегімен бірнеше пәтер тонады деген күдікпен төрт адамнан тұратын топты ұстады. Қаскөйлер негізінен жеке секторда әрекет етіп, үйлерге кіріп, құнды дүниелерді ұрлаған.

Жедел іс-шаралар барысында ұсталғандардың барлығы бұрын осыған ұқсас қылмыстар жасағаны үшін бірнеше рет сотталған басқа өңірдің тұрғындары екендігі белгілі болды. Олардың кейбір қылмыстық эпизодтары бейнебақылау камераларына түскен, бұл олардың жеке басын және қозғалыс жолдарын жылдам анықтауға мүмкіндік берді.

"Ұсталғандардың барлығының қылмыстық істері бар және олар тізбек бойынша әрекет еткен. Қаскөйлер қараусыз тұрған үйлерді таңдап, оларға қолдан жасалған құралдармен кірген. Басқа өңірлердегі әріптестермен өзара іс-қимылдың арқасында біз олардың орналасқан жерін тез анықтап, күдіктілерді ұстадық. Қосымша эпизодтарды анықтау жұмыстары жалғасып жатыр", - деді Алматы қалалық ПД криминалдық полиция басқармасының бастығы Талант Исаев.

Аталған дерек бойынша сотқа дейінгі тергеу амалдары жүргізіліп жатыр. Полицейлер ұсталғандардың қала мен облыс аумағында осыған ұқсас басқа да қылмыстарға қатысы бар болуы мүмкін екендігін жоққа шығармайды.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Алматы ұры Тонау