+7 (777) 001 44 99
Қазақша
Русский
English
Астана қаласының Алматы аудандық №2 соты Oil Construction Company ЖШС кәсіподақ төрағасы Амин Елеусіновке қатысты сот үкімін шығарды, - деп хабарлайды Tengrinews.kz тілшісі.
Ақтауда қаражат жымқырды деген күдікпен кәсіподақ төрағасы Амин Елеусінов биыл қаңтар айында ұсталған еді. "Амин Елеусіновтің қаражат жымқырып, кәсіподағындағы "ОСС" ЖШС жұмысшыларының ақшасын жымқыруы бойынша қозғалған қылмыстық іс тергеліп жатыр. Қажетті сот сараптамалары жүргізілді. Қазіргі уақытта Елеусіновтің кінәсін дәлелдейтін айғақтар жинастырылып жатыр", - деген еді Маңғыстау облыстық ІІД басшысының орынбасары Алдырза Қуанышкереев.
"А.С.Елеусінов оған сеніп тапсырылған Oil Construction Company ЖШС 1 611 жұмысшының 8 212 606 теңге 89 тиын ақшасын иеленіп, жұмсағаны үшін, сондай-ақ, билік өкілдеріне қатысты зорлық көрсету, яғни, 2017 жылдың 20 қаңтарында ұсталған кезде полиция қызметкерлеріне балағат сөздер айтқаны үшін айыпты деп танылды", - деді Астана қалалық сотының баспасөз қызметіндегілер.
Сондай-ақ, баспасөз қызметінің мәліметінше, Елеусінов прокурормен кінәсін мойындағаны жайлы процессуалдық келісімге келген. Ер адам тағылған айыптарды мойындап, өз әрекетіне өкінді.
"Сот Елеусіновті екі жылға бас бостандығынан айыру туралы, сондай-ақ, қылмыстық жолмен алынған мүліктерін тәркілеп, қоғамдық және кәсіподақта 5 жылға дейін жұмыс істеу құқығынан айыру туралы шешім шығарды", - деді Астана қалалық сотындағылар. Сот үкімі әлі заңды күшіне енген жоқ.
