Оралда 18 жастағы жігіт әріптесін сабап өлтіре жаздаған

Оралда екі әріптес төбелескен. Қазір олардың бірі жансақтау бөлімінде жатыр, екіншісі ұсталып, уақытша ұстау изоляторына қамалды, - деп хабарлайды Tengrinews.kz тілшісі. 

Батыс Қазақстан облысы Полиция департаменті өкілінің айтуынша, 23 қаңтарда таңертең орталық базарда жұмыс істейтін екі жүк тасушы төбелес болған. Бұрын қылмыстық жауапқа тартылған 26 жастағы оралдық 18 жастағы әріптесі үлкендігін құрметтемейтініне наразы болған.

"Түсте ер адам әріптесінің жұмыс орнына шағыммен қайтып келген. Жастар арасында жанжал пайда болып, төбелескен. Сол кезде 18 жастағы жігіт әріптесін қатты жарақаттаған. Жәбірленуші қалалық көпсалалы аурухананың жансақтау бөліміне жатқызылды", - деді БҚО полиция департаментінің ресми өкілі Болатбек Белгібеков.

Полицейлер 18 жастағы жігіттің Орал полиция басқармасының уақытша ұстау изоляторына қамалғанын атап өтті. Аталған дерекке байланысты Абай полиция бөлімі ҚК-нің 24-99-бабы "Адам өлтіруге оқталу" бойынша сотқа дейінгі тергеу тағайындаған.

Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!