+7 (777) 001 44 99
Қазақша
Русский
English
Ішкі істер министрлігі Қылмыстық-атқару жүйесі комитеті арнайы есепке алу бөлімшесінің басшысы пара алды деген күдікке ілінді. Лауазымды тұлғаның ұсталған сәті түсірілген видеоны Мемлекеттік қызмет істері және сыбайлас жемқорлыққа қарсы іс-қимыл агенттігі жариялады, - деп хабарлайды Tengrinews.kz тілшісі.
Брифинг барысында агенттіктің ресми өкілі Жанна Бастарова Сыбайлас жемқорлыққа қарсы іс-қимыл агенттігінің Астана қаласы бойынша департаменті өкілдерінің ҚР ІІМ Қылмыстық-атқару жүйесі комитеті арнайы есепке алу бөлімшесі басшысының алаяқтық әрекеттерін әшкерелегенін айтты.
"Ол елордадағы дәмханалардың бірінің маңында өзінің көлігінде сотталушыны Ақтөбе облысындағы түзеу мекемесінен Ақмола облысындағы мекемеге ауыстыру үшін делдал арқылы 2 800 доллар пара алды деген күдікке ілінді. Ол бұл үшін жалпы 6 800 доллар талап еткен - 2,3 миллион теңгеге жуық. Күдікті Сыбайлас жемқорлыққа қарсы бюро қызметкерлеріне қарсылық көрсетіп, оқиға орнынан жасырынып, заттай дәлелдердің - ақшалардың көзін жоймақшы болды", - деп хабарлады Жанна Бастарова.
Бастарова күдіктінің кінәсін толықтай мойындағанын айтып өтті.
"Соттың шешімімен күдіктіге қатысты бұлтартпау шарасы ретінде үй қамауына алу туралы шешім шықты. Лауазымды тұлғаға қатысты қозғалған қылмыстық іс аяқталып, айыптау актісімен бірге Астана қалалық прокуратурасына жолданды", - деп хабарлады Мемлекеттік қызмет істері және сыбайлас жемқорлыққа қарсы іс-қимыл агенттігінің ресми өкілі.
