+7 (777) 001 44 99
Қазақша
Русский
English
Қостанайда туған әкелерін үйден қуып шыққан балалары 700 мың теңгеден аса өтемақы төлеуге міндеттелді, - деп хабарлайды Tengrinews.kz Қостанай облыстық сотының баспасөз қызметіне сілтеме жасап.
Әйелімен ажырасқан азаматқа туған ұлдары қарсы шығып, сот шешімімен оны үйден шығарып жіберген. Сот өкілдерінің айтуынша, пәтерді кезінде ерлі-зайыптылар ортақ қаражатқа сатылып алып, 1990 жылы туған үлкен ұлдарының атына рәсімдеген. Себебі өздері мемлекеттік қордан пәтер алу кезегінде тұрғандықтан осындай шешімге келеді. Арада уақыт өткен соң ұлдары үйден қуып шыққан әке қаржылай өтемақы талап етіп, сотқа жүгінуге мәжбүр болыпты.
"Өз шағымында азамат өмір бойы жұмыс істеп, пәтер сатып алуға ақша жинағанын, бүгінде балалары әділетсіздік жасап отырғанын айтады. Баспананы сатып аларда үй құнының басым мөлшерін өзі төлегенінін мәлімдеген талапкер ұлдарының жасына және материалдық жағдайына орай үй сатып алуға мүмкіндіктерінің болмағандығын көрсетеді", -делінген сот хабарламасында. Сөйтіп, Қостанай қалалық соты азаматтың шағымын қанағаттандыру туралы шешім шығарып, әке пайдасына 725 840 теңге көлемінде өтемақы өндірді. Сот шешімі заңды күшіне неген жоқ.
