+7 (777) 001 44 99
Қазақша
Русский
English
Алматыда Биллклинтон Осипов есімді ер адам тұрады. Ол полицияда жұмыс істейді. Tengrinews.kz тілшісі АҚШ-тың бұрынғы президентімен аттас алматылықты тапты.
Биллклинтон Осипов - Оңтүстік Қазақстанның тумасы. 1996 жылы туған. Мұндай ерекше есімді оған ата-анасы қойған. Сол кезде АҚШ-тың 42-президенті танымал болған.
"Адамдар үнемі аты-жөнім шын ба, өтірік пе деп сұрайды. Төлқұжат бойынша есімім осындай әрі өзіме ұнайды. Бала кезімде ыңғайсыз болатын, бірақ қазір ондай жоқ, бәрі жақсы", - дейді ер адам.
Биллклинтон Серікұлының айтуынша, есімін өзгерту деген ой ешқашан болған емес.
"Отбасым мен достарым мені жай ғана Билл деп атайды", - деп қосты ол.
Бұған дейін БАҚ-та ол туралы жазылған болатын. Ұлының есімін анасы қойған. "Мен ұлымның әдемі және дені сау болып өскенін қаладым. Сол уақытта теледидардан Билл Клинтонды көрдім", - дейді анасы Қабила Осипова.
Ол саксофонда ойнағысы келгенін айтты. Бірақ жігіт өзін құқық қорғау органдарындағы қызметке арнауды шешкен. Ол үйленген, учаскелік инспектор болып жұмыс істейді. Бұған дейін ол банкте біраз уақыт жұмыс істеген.
"Негізінен, әкімшілік құқықбұзушылық, қоғамдық тәртіп, тұрмыстық зорлық-зомбылық мәселелерімен жұмыс істейміз. Маған полицияда жұмыс істеген ұнайды", - деп түйіндеді Биллклинтон Осипов.
Оның айтуынша, мүмкіндік туса, АҚШ-тың бұрынғы президенті, нағыз Билл Клинтонмен жеке кездесуге қарсы емес.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
