Оңтүстік Қазақстан облысында жүк пойызы рельстен шығып кетті, - деп хабарлайды Tengrinews.kz тілшісі "Қазақстан темір жолы" АҚ баспасөз қызметіне сілтеме жасап.
5 мамыр күні Астана уақытымен сағат 16:56-да жүк пойызы рельстен шығып кетті. "Шымкент жол бөлімшесіндегі Черноводск - Бадам аралығында жүріп бара жатқан жүк пойызының 29 вагоны рельстен шығып кетті. Учаскедегі қозғалыс тоқтатылды",- делінген хабарламада.
Баспасөз қызметінің мәліметінше, апат зардаптарын жойып, қалпына келтіру үшін Арыс пен Шымкент станцияларындағы өрт сөндіру пойыздары жұмылдырылды. "Қазақстан темір жолы" АҚ-ы жасақтаған комиссия жүк пойызының рельстен шығып кету себебін тексеруге кірісті.
Еске сала кетейік, 20 сәуірде Жамбыл облысындағы "Луговой-Құрағатты" бекетінің тұсында жүк пойызының 13 вагоны жолдан шығып кеткен болатын.
