+7 (777) 001 44 99
Қазақша
Русский
English
Павлодарда көпірдің бір бөлігі құлап түсті, - деп хабарлайды Tengrinews.kz тілшісі. Куәгерлердің айтуынша, Кутузов көпірі 12 мамыр күні кешке құлаған.
Жолдың қирауы трамвай жолының маңында болды. Нәтижесінде көпірдегі қозғалыс шектелді. Автомобиль иелері болған жағдайға наразылық білдіріп жатыр. "Өткен жылы бұл көпірге бірнеше ай бойы жөндеу жүргізілді. Сол кезде бізге жаңартып, қауіпсіз етіп береміз деп уәде берген. Жөндеу жұмыстарына көп қаражат бөлінді. Нәтижесі осылай болды", - деді халық.
Әлеуметтік желілерде жергілікті билікке шағым айтқандар көп болды. Пікірлердің арасында "көпір жұмсалған ақшаны көтере алмай құлап қалды" деген қалжың ойлар айтылды.
Әкімдіктің хабарлауынша, авариялық аймақта жөндеу жұмыстары жүргізілмеген. Дәл қазіргі уақытта оқиғаның неден болғанын анықтайтын комиссия құру қарастырылып жатыр.
Айта кетейік, 2014 жылдың жазында Кутузов көпірін авариялық деп танып, жөндеу жұмыстарын жүргізу үшін жауып тастаған еді. Қалалық әкімдіктегілер 130 миллион теңгеге жөнделген көпір ең кемі жарты ғасыр тұрады деп уәде берген еді.
