+7 (777) 001 44 99
Қазақша
Русский
English
Петропавлда полицейлер қаладағы серіктестіктердің бірінен ірі көлемдегі ақшаны ұрлады деген күдікпен екі адамды ұстады, оның бірі - Ресей Федерациясының азаматы, - деп хабарлайды Тengrinews.kz тілшісі Солтүстік Қазақстан облыстық ІІД баспасөз қызметіне сілтеме жасап.
Қалалық ІІБ Бірінші полиция бөліміне жергілікті ЖШС басшыларының бірі шағымданып, кәсіпорынға қарасты дүкеннің кеңсесіндегі сейфтен 950 мың теңгеге жуық қаражаттың ұрланғанын айтты. Шағымданушының айтуынша, қаланың өнеркәсіп аймағында орналасқан дүкенге ұрылар терезеден кірген. Ішкі істер қызметкерлері 1975 және 1989 жылы туған екі күдіктіні ұстады.
"Аталған ЖШС-те күзет қызметі мен дабыл жүйесі болмаған, сол себепті күдіктілерге қылмысты жасау оңайға соққан", - дейді Петропавл ІІБ Бірінші полиция бөлімінің аға тергеушісі Ирина Холодова.
Ұсталғандар бұрын қылмыстық жауапкершілікке тартылмаған болып шықты. Олардың бірі - Ресейдің Калининград облысының тұрғыны, ол Қазақстанға туыстарына қонаққа келіпті. Жауап алу барысында күдіктілер қылмыс жасағанын мойындады, олар ұрланған қаражаттың жартысына өздеріне керек-жарақ сатып алған.
Бұл дерек бойынша ҚР ҚК 175-бабымен қылмыстық іс қозғалды. Бұл баптың санкциясы 3 жылдан 10 жылға дейін бас бостандығынан айыру жазасын қарастырады. Полицейлер мекеме-кәсіпорын басшыларына есік-қабырғаларды берік етіп бекітуге және қаражат сақталатын нысандарға бейнебақылау қондырғыларын орнатуға кеңес береді.
