+7 (777) 001 44 99
Қазақша
Русский
English
Нұр-Сұлтан Полиция департаменті жаяу жүргіншілер өткелінде жасөспірімді қағып кеткен шенеуніктің ұлына қатысты оқиға қалай аяқталғанын айтты, - деп хабарлайды Tengrinews.kz тілшісі.
"30 сәуірде Түркістан көшесінде 2004 жылы туған кәмелетке толмаған баланы қағып кету дерегі бойынша сот-медициналық сараптама қорытындысы шықты. Оған сәйкес 16 жастағы балада дене жарақаты анықталған жоқ.
Сондай-ақ, кәмелетке толмаған баланың заңды өкілінен ЖКО дерегі бойынша жүргізушіге шағымдары жоқ екені және одан әрі тексеруден бас тартатыны туралы жазбаша өтініш келіп түсті", - деді департамент өкілі.
Жүргізушіге қатысты ӘҚБтК-нің 600-бабы "Жаяу жүргіншілердің немесе жол қозғалысының өзге де қатысушыларының жүруіне басымдық бермеу" бойынша әкімшілік іс қозғалды. Айыппұл 10 АЕК - 29 170 теңге.
Айта кетейік, бұған дейін Нұр-Сұлтан тұрғыны Facebook-те 21 жастағы жүргізуші жаяу жүргіншілер өткелінде жасөспірімді қағып, қашып кеткенін көргені туралы жазба жариялағаны хабарланған болатын. Ол көлік тізгінінде шенеуніктің ұлы болғанын айтқан еді.
"Жай ғана жасырынған емес, фитнес-орталықтың маңына тұрақтап, одан әрі спортпен шұғылданбақ болды. Абырой болғанда, жақын маңда жүрген тағы бір қызбен оның есін жиып, жол полициясы мен зардап шеккен адамға жедел жәрдем шақырдық", - деп жазды ол.
Кейін Қаржы министрлігі Мемлекеттік кірістер комитетінің басқарма басшысы Дамир Нұрғалиев Toyota көлігіндегі ұлы Нұр-Сұлтандағы жаяу жүргіншілер өткелінде жасөспірімді қағып кеткенін растады.
"Мен ҚР Қаржы министрлігі Мемлекеттік кірістер комитетінің басқарма басшысы лауазымын атқарамын және "жоғары лауазымды шенеунік" саналмаймын. Бұл жағдайды жол-көлік оқиғасы ретінде анықтау, оның біліктілігі және барлық жағдайы тиісті шешім қабылдайтын құқық қорғау органдарының құзыретіне кіреді", - делінген Нұрғалиевтің хатында.
Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!
