+7 (777) 001 44 99
Қазақша
Русский
English
Қазақша
Русский
English
Биыл алматылық "Қайрат" сапында өнер көрсетіп жүрген ресейлік танымал футболшы Андрей Аршавин Алматы қаласындағы бутиктердің бірінде 4,7 миллион теңгеге сауда жасағаны жайлы қауесетті жоққа шығарды, - деп хабарлайды Tengrinews.kz тілшісі. Айта кетейік, осыған дейін Қазнет қолданушылары белгісіз ер адамның 12 мың долларға жасаған саудасын қызу талқылаған еді.
Айта кетейік, әлеуметтік желілерде Алматыдағы дүкендердің бірінен 5 миллион теңгеге жуық қаражатқа жасалған сауданың түбіртегінің суреті қызу талқыланып жатыр. Тізімнен Gucci орамалының 29 600 теңгеге сатып алынғанын, үйге киетін аяқ киімнің 120 400 теңгеге алынғанын және Armani жейдесінің 95 мың теңгеге, сонымен қатар, басқа да заттардың сатып алынғанын көруге болады. Ал "Қайрат" клубының жаңа футболшысы дәл осы уақытта қалаға келген еді.
Tengrinews.kz тілшісі спортшымен байланысып, осы жағдайға қатысты пікірін сұрады. Телефон арқылы әңгімелесу кезінде ол тұтқаны қоя салды. Алайда Аршавин мессенджер арқылы мұндай сомаға зат алмағанын растады. "Жоқ, бұл мен емес", - деп қысқа қайырды Аршавин.
Мұның алдында дизайнер әрі фэшн-продюсер Сәкен Жақсыбаев Алматыдағы дүкендердің бірінен 4,7 миллион теңгеге сауда жасаған тұтынушының талғамы жақсы екенін айтқан болатын. "Бұл шамамен 12-13 мың доллар. Менің ойымша, Алматы мен Астанада тұратын мұндай адамдардың көбі осындай көлемдегі қаражатты жұмсай алады. Мысалы, Chanel брендінің бір костюмі 13 мың доллар тұрады. Қолтырауынның терісінен тігілген үш сөмке сатып алу үшін 100 мың доллар жұмсайтын адамдарды да білемін. Елімізде мұндай деңгейдегі адамдардың болғаны жақсы", - деді Сәкен Жақсыбаев.
