+7 (777) 001 44 99
Қазақша
Русский
English
"Астана" футболшылары Еуропа лигасы үшінші іріктеу кезеңінің бірінші матчында мальталық "Валлеттаны" тас-талқан етті, - деп хабарлайды Vesti.kz.
"Астана Аренада" өткен ойын 5:1 есебімен аяқталды.
"Астана" ойынның төртінші минутында алға шығуға жақын болған, бірақ қонақтарды қақпа маңдайшасы құтқарып қалды. Бірақ араға төрт минут салып Қазақстан чемпионы алға шықты - Исландия құрамасының жартылай қорғаушысы Рунар Мар Сигурьонссон қанжығасын майлады.
"Астананың" екінші голы 15-минутта соғылды. Бұл жолы Сигурьонссонның пасынан кейін қорғаушы Юрий Логвиненко баспен дәл ойнады.
Матчтың 35-минутында алаң иелері үшінші голын соқты. "Астана" қорғаушысы Дмитрий Шомко допты ауттан ойынға қосып, Марин Томасовты ұрымтал тұсқа шығарған - хорват қарсыластан сытылып өтіп, "Валетта" қақпашысы Анри Бонеллоны шарасыз қалдырды.
"Астана" төртінші голын 57-минутта соқты - Сигурьонссон дубль авторы атанды.
Артынша "Валлетта" есеп айырмасын қысқарта алды. 67-минутта италиялық шабуылшы Пабло Фонтанелла көзге түскен. Бірақ соңғы сөз "Астана" ойыншыларында қалды. Ойынға тыңнан қосылған Кюрасао құрамасының шабуылшысы Рангело Янга матч нүктесін қойды. Қорытынды есеп - 5:1.
© Тұрар Қазанғапов
Айта кетейік, енді қарымта матч 16 тамызға қараған түні Та-Калиде өтеді. Матч Нұр-Сұлтан уақытымен 00:00-де басталады. Бұл жұпта үздік болған клуб Еуропа лигасының плэй-офф кезеңінде беларусьтік БАТЭ мен босниялық "Сараево" текетіресінің жеңімпазымен кездеседі.
