+7 (777) 001 44 99
Қазақша
Русский
English
Қазақша
Русский
English
Қазақстан футбол федерациясының (ҚФФ) бас хатшысы Азамат Айтхожин 2022 жылғы әлем чемпионатында ұлттық құраманың Франциядан жеңілгеніне қатысты пікір білдірді. Ол федерацияға мемлекеттік бюджеттен бөлінген ақша туралы, құрама үшін футболшылар резервінің жоқтығы және мемлекеттік қаржыландырудан бас тарту туралы шешім қабылдағанғанын айтты, деп хабарлайды Vesti.kz.
Азамат Айтхожин тарихтағы ең ірі жеңілісіне себеп деп көптеген негізгі ойыншылардың азайғанын және жалпы ұлттық команда резервінің болмауын айтты.
"Бүгінгі таңда бізде ұлттық құраманың резерві жоқ деп айтуға болады. Команда жетекшілерін алмастырған ойыншылар әлі халықаралық деңгейде ойнауға дайын емес", - деді Айтхожин.
Сондай-ақ, ол федерацияға мемлекеттік бюджеттен бөлінген сомалар жария етілген сомаға қарағанда әлдеқайда аз екенін атап өтті.
"Жұртшылықтың сынына келетін болсақ, ашық айтайын: өткен жылдары Қазақстан футбол федерациясы мемлекеттік бюджеттен 200 миллион теңгеден алды, олар түрлі құрамалар үшін халықаралық жарыстарға: жасөспірімдер (U17, U19), жастар U21, Blind-Football (зағип жандарға арналған футбол), әйелдер, ұлттық, жағажай, сондай-ақ футзал құрамаларына дайындықты және ұйымдастыруды көздеді. Миллиард туралы әңгіме қайдан шықты?
Келесі жылдан бастап Қазақстан Футбол федерациясы мемлекеттік және квазимемлекеттік құрылымдар есебінен қаржыландырудан бас тарту туралы шешім қабылдады. Ұйым УЕФА қаражатының түсуі, сондай-ақ демеушілік ақшаны тарту есебінен қаржыландырылады.
Сондықтан, ұлттық құраманың сәтсіздіктерінен кейін өзін жарнамалағысы келетін сыншылар мен популистерге айтайын: сіздер, ең болмағанда, мәселенің мәнін түсінуге тырысыңыздар, ойға келгенді айта берудің алдында материалдық бөлігін оқып шығыңыздар.
Футбол әрқашан біздің елде болған және солай болып қалады. Бұл, сөзсіз, миллиондаған адам ұнататын спорт түрі. Әрине, оны жаңа деңгейге көтеру үшін жылдар қажет және барлығының қолдауы қажет. Команда жеңіске жетсе, сіздер кеше осы жігіттерге айтқан сынды ұмытып, оларды әрдайым қолдадық дейсіздер. Сондықтан команданың басынан әрдайым жеңіліс те, жеңіс те қатар өтеді.
Сондай-ақ, жақын арада ұлттық құраманың бас жаттықтырушысымен бірге жұртшылықты толғандыратын сұрақтарға жауап беру үшін жетекші спорт журналистерімен кездесу өткіземіз", - деп келтіреді ҚФФ сайты Айтхожиннің сөзін.
Еске салайық, Қазақстан құрамасы 2022 жылғы әлем чемпионатында іріктеу кезеңін D тобының соңғы орнында аяқтады. Құрамамыз Франциядан ойсырай ұтылған еді. Бұл Қазақстанның ресми ойындардағы ең ірі жеңілісі болып тіркелді. Франция құрамасы қазақстандық футболшыларды 8:0 есебімен жеңді. Матчте Килиан Мбаппе Франция сапындағы алғашқы покерін жасады. Одан бөлек, Карим Бензема екі гол соқса, Гризманн мен Рабьо да бір-бір голмен есепті еселеді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
